ENSINO PRIMARIO

      Onte (martes 24) tivo lugar unha reunión en Madrid entre a Ministra de Educación e as persoas representativas das distintas Consellarías de Educación de varias Comunidades Autónomas, entre elas Galiza. Nesta reunión acordaron que para a convocatoria do concurso-oposición deste ano vaise continuar aplicando a norma reguladora que estaba en vigor o pasado ano, co cal de momento non hai mudanzas neste sentido.
      A continuación transcribimos o acordo ao que se chegou onte, 24 de xaneiro:
      "As Comunidades Autónomas asinantes, asistentes á reunión da Comisión Xeral de Educación, celebrada os días 23 e 24 de xaneiro de 2006, despois de analizar o estado actual da tramitación parlamentaria do Proxecto de Lei Orgánica de Educación e o calendario previsíbel para a súa aprobación definitiva e o seu desenvolvemento regulamentario, comunican a súa intención de proceder á convocatoria dos procesos do concurso-oposición para o acceso á función pública docente al amparo do Real Decreto 334/2004, de 27 de febreiro, norma reguladora actualmente en vigor.
      Con esta decisión e ante a imposibilidade material de contar cunha nova normativa regulábel nas datas en que se teñen de publicar ditas convocatorias para garantir o cumprimento dos prazos legalmente exixíbeis, as Comunidades Autónomas asinantes queremos contribuír para reforzar a seguridade xurídica das persoas que aspiran a participaren nos mencionados procesos de concurso-oposición"
      (Seguen as sinaturas das representacións de Canarias, Andalucía, Galiza, La Rioja, Madrid, Castilla-La Mancha, Extremadura, Asturias, Illes Balears, Catalunya, Aragón e Castilla y León)
      Agardando que esta información sexa do teu interese, enviámosche un saúdo.

CIG-Ensino.

20 de Xaneiro de 2006

      Na reunión da Mesa Sectorial do día 19 de xaneiro de 2006, ante o requirimento da CIG-Ensino a Consellaría informou de que si haberá oferta pública de emprego no presente ano, tanto en Primaria como en Secundaria. A oferta de especialidades e prazas vai ser negociada coas organizacións sindicais a comezos do mes de febreiro  e os temarios van ser os mesmos que os de anos anteriores. En canto á modalidade pola que se van convocar as oposicións, caben dúas opcións: se a aprobación da LOE ten lugar no mes de febreiro (algo que se ve difícil), a convocatoria de oposicións faríase segundo o novo Real Decreto de acceso a desenvolver a partir da LOE. No caso de que se retrasase a aprobación da LOE habería que facer a convocatoria polo sistema en vigor até este momento (Real Decreto 334/2004). Disto tamén depende o número de prazas a ofertar, que sería maior no caso de que a convocatoria se realizase segundo o novo Real Decreto. A CIG-Ensino demandou que a negociación da oferta de emprego facilitara a estabilidade do profesorado interino, para o cal habería que negociar en paralelo a estabilidade deste profesorado.